Sa kushton një agjent AI për biznes në Kosovë dhe në rajon?
Një agjent AI ka dy lloje kostosh: ndërtimin, që paguhet një herë, dhe kostot e punës, që paguhen çdo muaj. Ky udhëzues i tregon të dyja, çfarë i lëviz dhe si ta llogarisësh vetë faturën mujore të modelit.
Nga Adrian Fusha, Pluton Studio
Në këtë faqe
Përgjigjja e shkurtër
Ka dy lloje agjentësh. Agjenti për mesazhe u përgjigjet klientëve në Instagram, Facebook, WhatsApp, Viber ose në webfaqe, jep çmimet nga katalogu, kontrollon masën dhe stokun dhe merr porosi e rezervime. Agjenti brenda sistemeve të tua të tjera merret me faturat në kontabilitet, dispeçerinë, përgjigjet nga të dhënat e tua ose klientët e mundshëm në një CRM, dhe është ndërtim më i madh, sepse çdo sistem që prek kërkon veglat, lidhjet dhe testet e veta.
Të dy përfshijnë veglat e veta, regjistër të çdo veprimi, miratim te hapat që zgjedh ti dhe teste me mesazhet e tua reale. Proceset, sistemet dhe gjuhët shtesë shkruhen veç e veç në ofertë.
Për çfarë paguan
Punë ndërtimi që paguhet një herë, pastaj kosto që paguhen çdo muaj:
| Pjesa | Çfarë mbulon | Kur paguhet |
|---|---|---|
| Analiza e procesit | Si ecën procesi: nga vijnë kërkesat, cilat sisteme i mbajnë të dhënat, cilët hapa presin miratimin tënd | Biseda e parë dhe oferta janë falas; te një sistem më i madh, analiza është pjesë e punës në ofertë |
| Ndërtimi, për proces | Udhëzimet e agjentit, veglat, hapat e miratimit dhe regjistri për një proces | Një herë |
| Integrimet | Lidhja me çdo sistem ku agjenti lexon ose shkruan: inboksi, WhatsApp Business, kalendari, sistemi i rezervimeve, kontabiliteti, baza e të dhënave | Një herë, për çdo sistem |
| Gjuhët | Udhëzime, përgjigje dhe teste për çdo gjuhë në të cilën vijnë kërkesat: shqip, anglisht, gjermanisht | Një herë, për çdo gjuhë |
| Testimi | Provimi i agjentit me mesazhet dhe dokumentet e tua reale, dhe ndreqja e asaj që gabon, para daljes në punë | Një herë, pjesë e ndërtimit |
| Përdorimi i modelit | Sa faturon ofruesi i modelit të gjuhës për tekstin që agjenti lexon dhe shkruan | Çdo muaj, sipas vëllimit, i vlerësuar në ofertë |
| Tarifat e kanaleve | Sa faturon vetë platforma e mesazheve. WhatsApp: Meta i faturon për mesazh të dorëzuar shabllonet dhe, nga 1 tetori 2026, përgjigjet mbi 1.000 në muaj për numër, me çmimin e njoftimit, rreth 0,6 centë te një numër i Kosovës, 1,75 centë te Shqipëria dhe 4,6 centë te Gjermania (shabllonet e marketingut kushtojnë më shumë). Viber: 115 € në muaj për bot, plus rreth 1,4 centë për çdo mesazh që e nis boti te Kosova ose Shqipëria. Instagram, Facebook (Messenger) dhe web chat-i: pa tarifë platforme | Çdo muaj, sipas vëllimit; tarifat e WhatsApp i paguan ti drejtpërdrejt te Meta |
| Hostimi | Serveri, baza e të dhënave dhe regjistri ku punon agjenti | Çdo muaj |
| Mirëmbajtja | Përditësimi i rregullave, veglave dhe përgjigjeve kur ndryshon biznesi, shqyrtimi i regjistrit, kalimi në një model të ri kur ofruesi e tërheq të vjetrin | Çdo muaj ose për çdo ndryshim, siç shkruhet në ofertë |
Çfarë e ngre koston dhe çfarë e ul
I njëjti agjent mund të kushtojë shumë ndryshe, varësisht nga këto zgjedhje:
| E ngre koston | E ul koston |
|---|---|
| Shkrim në sistemet e tua të tjera: kontabilitet, dispeçeri, CRM | Punë vetëm me mesazhe: përgjigje, porosi, rezervime |
| Disa procese njëherësh | Një proces në fillim, tjetri kur i pari punon |
| Sisteme pa asnjë lidhje, që kërkojnë eksporte ose lexim email-esh | Sisteme me lidhje të dokumentuar (API) |
| Kërkesa në disa gjuhë, të përziera ose në dialekt | Një gjuhë kryesore për versionin e parë |
| Rregulla miratimi me disa role dhe kufij shumash | Një person që miraton, ose agjenti që i konfirmon vetë hapat e zakonshëm |
| Skanime të dobëta dhe dokumente të shkruara me dorë | PDF të pastra dhe email-e të shkruara |
| Vëllim i madh, që e rrit faturën mujore të modelit | Rregulla të thjeshta për rastet që s'kanë nevojë për model |
Si t'i llogarisësh kostot e modelit
Modelet faturohen për çdo milion token (token-i është një copë fjale), zakonisht me një tarifë për tekstin që modeli lexon dhe një tjetër për tekstin që shkruan.
Në çdo hap agjenti i rilexon udhëzimet dhe të dhënat e veglave, prandaj një detyrë shpesh harxhon disa mijëra token, më shumë për detyrat me shumë hapa dhe dokumentet e gjata. Asistenti i kësaj webfaqeje, për shembull, lexon disa mijëra token udhëzime dhe listë faqesh për çdo pyetje.
Llogaria: token për detyrë, herë detyra në muaj, herë tarifa aktuale e ofruesit. 1.000 kërkesa në muaj me nga 5.000 token bëjnë 5 milionë token; këtë e shumëzon me tarifën në faqen e çmimeve të ofruesit. Gjatë testimit i masim token-at realë për detyrë në mesazhet e tua, që shifra në ofertë të dalë nga puna jote, jo nga një hamendje.
Tarifat ndryshojnë shpesh, prandaj nuk publikojmë tabelë çmimesh të ofruesve. Një kufi shpenzimesh te ofruesi, kur e ofron, dhe rregulla të thjeshta për rastet pa model e mbajnë faturën të parashikueshme.
Fushëveprime tipike dhe sa zgjasin
Nis me një proces, vëre në punë dhe mate rezultatin para se të shtosh të dytin. Oferta falas me shkrim e fikson çmimin e ndërtimit për fushëveprimin tënd dhe i vlerëson kostot mujore.
| Fushëveprimi | Çfarë përfshin | Versioni i parë |
|---|---|---|
| Mesazhet | Një agjent që u përgjigjet mesazheve të klientëve: çmimet nga katalogu yt, masa dhe stoku, porosi dhe rezervime, me regjistër dhe testim | 1 deri në 2 javë në webfaqe, 3 deri në 6 javë në disa kanale |
| Një proces në sistemet e tua | Një agjent për një punë brenda sistemeve të tua, si faturat e furnitorëve që lexohen dhe përgatiten për kontabilitet: një burim kërkesash, sistemi ku shkruan, regjistri dhe testimi | 2 deri në 4 javë |
| Disa procese | Dy a më shumë punë me vegla të përbashkëta dhe një regjistër, si porositë plus ndjekja e klientëve, të shtuara një nga një | Procesi i parë si në rreshtat më lart, pastaj një pas një |
| Disa sisteme | Agjentë që punojnë në disa sisteme, si rezervimet, kontabiliteti, të dhënat e klientëve dhe mesazhet, shpesh me një ekran shqyrtimi për stafin tënd | I planifikuar me faza në ofertë |
Ku qëndron një agjent mes shërbimeve tona
Automatizimi i proceseve i kryen të njëjtët hapa fiksë çdo herë, edhe kur njëri prej tyre përdor AI për të lexuar një dokument. Agjenti vendos cilën nga veglat e tij të përdorë për çdo kërkesë. Cili të përshtatet:
| Çfarë blen | Kur ka kuptim |
|---|---|
| Chatbot AI ose agjent AI për mesazhe (e njëjta ofertë): përgjigjet në Instagram, Facebook, WhatsApp, Viber dhe në webfaqe, jep çmime, merr porosi dhe rezervime | Të njëjtat pyetje vijnë vazhdimisht në mesazhe, dhe porositë ose rezervimet mund të merren aty |
| Automatizim procesi: një proces i plotë, të njëjtët hapa çdo herë | Puna nuk e ndryshon formën, ndryshojnë vetëm të dhënat |
| Agjent AI në sistemet e tua: dokumentet në kontabilitet, dispeçeria, përgjigje nga të dhënat e tua, klientët e mundshëm në CRM | Kërkesat ndryshojnë, dhe puna duhet të vazhdojë në sistemet e tua të tjera |
| Aplikacion web ose platformë | Të duhet një sistem i tërë rreth agjentit, me ekrane për stafin |
| Sisteme më të mëdha AI | Disa agjentë dhe sisteme njëherësh, të planifikuar me faza |
Si të marrësh një shifër të saktë
Një bisedë për një proces, pastaj një ofertë fikse me shkrim, falas, brenda dy ditësh pune: çmimi i ndërtimit, kostot mujore të vlerësuara, afati. Pa tarifë për orë. Pagesa bëhet gjysma në fillim dhe gjysma kur del në punë, ndërsa projektet më të mëdha ndahen në tri faza.
Si i ndërtojmë agjentët dhe mbrojtjet në secilin i ke te agjentë AI për biznes. Nuk je i sigurt që të duhet agjent? Lexo më parë agjent AI apo chatbot, ose shih sa kushton një chatbot.
Pyetje të shpeshta
Sa kushton një agjent AI i thjeshtë?
Një agjent i thjeshtë, që u përgjigjet mesazheve të klientëve dhe merr porosi e rezervime, është ndërtimi ynë më i vogël me AI dhe e njëjta ofertë me chatbot-in; ai që punon brenda sistemeve të tua të tjera kushton më shumë. Çmimin e saktë të ndërtimit e merr në një ofertë fikse me shkrim, falas brenda 2 ditëve pas një bisede, bashkë me vlerësimin e kostove mujore të modelit dhe të hostimit.
Cilat janë kostot mujore të një agjenti AI?
Përdorimi i modelit, që faturohet për token dhe rritet me vëllimin; hostimi; mirëmbajtja, siç merremi vesh; dhe në WhatsApp ose Viber tarifat e vetë platformës: WhatsApp-i faturohet nga Meta për mesazh dhe e paguan drejtpërdrejt ti, ndërsa një bot në Viber kushton 115 € në muaj. Oferta i vlerëson të gjitha për vëllimin tënd para se të nënshkruash.
A kushton një agjent AI më shumë se një chatbot?
Jo për mesazhe: chatbot-i dhe agjenti për mesazhe janë e njëjta ofertë, me të njëjtin çmim. Çmimi rritet kur agjenti vepron brenda sistemeve të tua të tjera, si kontabiliteti, dispeçeria ose një CRM, sepse secili kërkon veglat, lidhjet dhe testimin e vet.
A mund të nisim me pak?
Po, dhe këtë e këshillojmë: një proces, në punë dhe i matur, pastaj tjetri. Çdo zgjerim ofertohet para se të nisë.
A faturoni me orë?
Jo. Merr falas një ofertë fikse me shkrim brenda dy ditësh pune pas bisedës së parë. Pagesa: gjysma në fillim, gjysma kur del në punë; projektet më të mëdha në tri faza.
Si t'i llogaris vetë kostot e modelit?
Shumëzo token-at për detyrë me detyrat në muaj, pastaj me tarifën aktuale të ofruesit për token. Një detyrë e agjentit shpesh harxhon disa mijëra token; dokumentet e gjata më shumë.